Mahana maha i te 27 no tenuare 2022 – Mai te monire mairi ae nei to te tavana no Faa’a, Oscar Temaru piiraa i tona nunaa ia afai mai i te mau taoa horoa no te nunaa no te fenua Tonga tei tairi hia e te moua auahi.
E hope te reira faanahoraa i teie mahana i te hora 12. Rave rahi mau fetii tei afai atu te mau o i te pu totiare no te fare oire no Faa’a, mai te pape, te mau ahu, te mau punu maa, te mau maa puohu e te vai atu ra. I teie avatea ia ratou e hopoi atu ai i teie mau o i nia i te uahu no Motu uta. Haapao hia mai te reira pu totiare e Heimata Avaemai. Faaroo mai tatou tona manao, uiui hia e Tupatiri Jennings.
Teie te mahana hopea e faarii hia mai ai ta outou mau tauihaa horoa i te uahu no Motu uta i te hora 5 e te afa i teie taperaa mahana. No reira, tiai hia maira ta outou mau pape, ta outou mau ahu, te mau ohipa no te tamaraa, e te maa eita e ino. E reva atu ia te pahi Tahiti Nui 1 i te mahana pae 28 no tenuare no te fano atu i Nuku’alofa.