Monire i te 23 no me 2022 - I te mahana pae mairi ae nei to te oire no Paea, faahanahanaraa te parau no hoperaa, Matarii i nia e no te taeraa mai Matarii i raro, oia hoi Matarii i nia, te tau no te ohune e Matarii i raro, te tau no te oe, iti hia te ohune o te mau hotu o te fenua, te mau maa hotu e te mau maa tupu, iti atoa hia te mau maa o te moana.
Te tau o Matarii i nia mai te taio mahana 20 novema e tae atu i te 20 no me. Na reira atoa te tau o Matarii i raro mai te taio mahana 20 me e tae atu i te 20 no novema. Piti atu 200 taata tei amui mai i roto i te reira faahanahanaraa, amui mai te tavana, Anthony Geros e te tahi pae o te mau mono tavana e te mau mero apooraa oire, na reira atoa te tahi pae o te mau taatiraa e te nunaa e te tahi mau manihini no te oire no Punaauia e to Faa’a. Ua tupu maitai te reira faahanahanaraa. Teie mai te manao o te mono tavana matamua o Patricia Jennings, ta Tupatiri i uiui atu na tatou.
Ua rave hia te reira na roto i te mau orero e te mau himeneraa no roto mai te mau taatiraa. Rave atoa hia te parau no te inuraa ava opani hia atu na roto i te pupuraa i te mau o i nia i te tai na roto i te faanahoraa mori hinu i roto i te apu haari. Ua tupu maitai taua oroa ra, rave rahi mau taata tei tae mai no te reira opani roa hia atu ai na roto i te mau amuamuraa. Tei mai te manao o Jean- Claude Hauata no te taatiraa tei tapea hia mai.